OPEN

တိတ်တစ်ခိုးအလွမ်း

February 13, 2020

ကိုယ်အားငယ်စဉ်က
ကြိုးစားရုန်းကန်စဉ်က
အကျိုးအကြောင်းမဲ့ ထားခဲ့သူတွေ
အကြောင်းအမျိုးမျိုးပြ ကျောခိုင်းခဲ့သူတွေ
ကိုယ်မျော်လင့်ချက် ကင်းမဲ့စဉ်က
ဒါဏ်ရာပါရပွနဲ့ နာကျင်စဉ်က
ကိုယ့်အနား မပြောမဆို
မင်းရောက်လို့လာတယ်

ကိုယ်တို့နှစ်ဦး
ညသန်းကောင်မှာ
ကောင်းကင်ကို ငှေးကြည့်မယ်ဆိုရင်
လမသာရင်လဲ ဖြစ်တယ်
ရေတွက်စရာ ကြယ်မပေါ်လာလဲ ဖြစ်တယ်
မင်းဘေးနားမှာ နေခွင့်ရှိမယ်ဆိုရင်
လမိုက်ညဖြစ်ပါစေ လှပနေမှာ

ကိုယ်တို့နှစ်ဦး
စိတ်ငြိမ်လမ်းထဲ ပြန်လာတယ်ဆိုရင်
သစ်ပင်အရိပ်အောက် ဖြတ်သွားတယ်ဆိုရင်
လမ်းဆုံးရောက်မှာ စိုးလှပါတယ်
အချိန်ကုန်သွားမှာ စိုးလှပါတယ်
ခွဲခွါမယ့်ချိန် ရောက်လို့လာမှာ
ကြောက်လှပါတယ်.

ဝေးကွာချိန်မှာ
အဆက်အသွယ်မရှိ
ရက်တွေ လတွေ
ကြာလေပေမယ့်
ရင်ကိုစိုးမိုး နေရာယူထား
ကိုယ့်နှလုံးသား ပိုင်ဆိုင်ထားသူ
မင်းလေးပါကွယ်

မင်းကို လွမ်းတယ်ဆိုတာ
မင်းဘေးနားမှာ ကိုယ်ရှိနေခဲ့တဲ့
အချိန်တွေကို လွမ်းတာ
လွမ်းလွန်းလို့လဲ ငိုဖူးပါတယ်
မပြောရဲလို့လဲ ခံစားရပါတယ်
ဝေးရလို့လဲ ဖြေသိပ်ရပါတယ်
ဟန်ဆောင်ရလို့လဲ ပင်ပန်းလှပါတယ်

Romance Me မှ ကောက်နှုတ်ချက်တစ်ချို့

 

ချစ်ခြင်းများစွာဖြင့်

Levi Sap Nei Thang
www.LeviSapNeiThang.com
FB: www.facebook.com/LeviSapNeiThang.net
IG: www.instagram.com/levi_sap_nei_thang



Menu